СÆТТИ ÆМÆ БÆТТИ

Сæтти æмæ Бæтти дыууæ сыхаджы уыдысты.

Сæтти — магусайæ цæлуарзаг, Бæтти та — уæззау куыстæй дзæгъæлгуыстгæнæг.

Сæттийæн уыд сахъари хæдзар, Бæттийæн та — кауын хæдзар. Сæттийæн йæ ис, йæ бис-иу зæронд куыдз, Бæттийæн та-иу уасаг гæды. Сæтти — даргъ лæг, Бæтти — цыбыр лæг.

Сæттийæн — стыр сырх зачъетæ, Бæттийæн — чысыл бур зачъе. Сæттийыл — урс дæлæсин цухъа, Бæттийыл — бур уæлæсин цухъа. Сæттийыл — къогъодзитæ, Бæттийыл — æрчъитæ. Сæ райгуырдæй сæ амæлынмæ хицæн нæ кодтой, афтæмæй та иумæ æнцад цæрын нæ зыдтой. Сæ ми, сæ ныхас кæрæдзиуыл нæ бадт, афтæмæй æнæкæрæдзи дæр нæ фæрæзтой.' Сæтти Бæттийыл худти, Бæтти — Сæттийыл. Иу иннæмæй адæмæн æмбисæндтæ хаста, дæлджинæг æй кодта. Атто фæрсы Биттойы:

— Сæтти æмæ Бæтти нæма бафидыдтой?

— Фæндгæ сæ бæргæ кæны.

— Фæлæ, цы?

— Фæстаг хатт цæй фæдыл фæхъæлæба сты, уый сæ ферох. Сæтти æмæ Бæттийы — адæмон сфæлдыстады ныхмæвæрд фæлгонцты ахæмтæй зонынц ирон адæм, æмæ чи нæ фæфидауы, уыдоны тыххæй фæзæгъынц: «Мæнæ Сæтти æмæ Бæтти!» «Сæтти æмæ Бæттиау та сæ мыды къæм бахауд».

кæс «АРВЫ ДУАР»-Ы СÆРГÆНДТÆ